Përmbledhje:
- Sipas projektligjit “Për Shërbimet Digjitale”, platformat mund të kufizohen në përdorimin e kërkimeve, klikimeve, vendndodhjes dhe interesave tona për të na shfaqur reklama të zgjedhura posaçërisht për ne.
- Këtu nuk bëhet fjalë për telefonatat bezdisëse nga call center-at, por për reklamat që shfaqen në Facebook, Instagram, Google apo faqe të tjera, pasi platformat kanë analizuar aktivitetin tonë online.
- Drafti, i orientuar nga Digital Services Act i Bashkimit Evropian, synon që përdoruesit të kuptojnë pse po u shfaqet një reklamë dhe të kenë më shumë kontroll mbi përdorimin e të dhënave të tyre personale.
Shqipëria synon të kufizojë reklamat me profilizim. Çfarë do të ndryshojë për përdoruesit? Shqipëria po përgatit një kuadër të ri ligjor për platformat digjitale, i cili përfshin edhe rregulla më të forta për reklamat online të bazuara në profilizimin e përdoruesve. Projektligji “Për Shërbimet Digjitale”, aktualisht në konsultim publik, është frymëzuar nga Digital Services Act (DSA) i Bashkimit Evropian dhe synon të rrisë transparencën, mbrojtjen e konsumatorëve dhe kontrollin mbi mënyrën se si platformat përdorin të dhënat personale. Profilizimi është procesi përmes të cilit platformat analizojnë sjelljen e përdoruesve, kërkimet, klikimet, vendndodhjen dhe interesat për t’u shfaqur reklama të personalizuara. Këto reklama janë bërë modeli kryesor i biznesit për shumë rrjete sociale dhe platforma digjitale. Projektligji parashikon kufizime për këtë praktikë dhe vendos detyrime të reja për ofruesit e shërbimeve digjitale. Në rast shkeljesh, parashikohen gjoba që mund të arrijnë deri në 6% të xhiros vjetore globale të kompanisë, një nivel i ngjashëm me sanksionet e parashikuara nga legjislacioni evropian. Drafti parashikon gjithashtu që AKEP të shërbejë si Koordinator i Shërbimeve Digjitale, duke bashkëpunuar me Komisionerin për Mbrojtjen e të Dhënave Personale, Autoritetin e Konkurrencës, Autoritetin Kombëtar për Sigurinë Kibernetike dhe institucione të tjera përgjegjëse. Ofruesit e huaj pa seli në Shqipëri do të duhet të caktojnë një përfaqësues ligjor në Shqipëri ose në një shtet të Bashkimit Evropian. Megjithatë, është e rëndësishme të bëhet dallimi mes reklamave të personalizuara dhe reklamave me profilizim. Projektligji nuk nënkupton zhdukjen e çdo reklame të personalizuar, por vendos kufizime mbi përdorimin e të dhënave personale për krijimin e profileve të detajuara të përdoruesve, duke synuar më shumë transparencë dhe kontroll për qytetarët. Nëse miratohet, ligji do ta afrojë Shqipërinë me standardet evropiane për ekonominë digjitale dhe do të ndryshojë mënyrën se si platformat ndërkombëtare operojnë në tregun shqiptar.
